Mier – das heisst, d Carolin, d Julia ond de Linus Vogel – si dröi Gschwösterti vo Romoos. Ufgwachse si mier am Fuess vom Napf ufem Bio-Hof „Breitäbnet“. Det, uf 1200 Meter öber Meer, hei mier scho glii agfange, zäme z singe ond musiziere. Nach de erschte Uftrett vo de zwe Schwestere het ou de Linus s Musigfieber packt. Setthär beriicheret är d Musig met rassige Schwyzerörgelikläng, schöne Melodie ond nöie Idee. Sett es paar Jahr komplettiert de Papi Stefan am Bass üsi Familieformation.

… ond üsi Musig

Üses Repertoire esch e kunterbunte Mix us traditionelle Ländlerstück us aune Egge vo de Schwiiz, rassige Örgelitänz, moderner Volksmusik ond nöie Interpretatione vo bekannte Melodie. Ab ond zue luege mier ou öber die musikalisch Landesgränze ond spele uf üsne Instrumänt Kompositione us anderne Kulture. Chorz: Üsi Musig esch genau so oonderschedlech ond vöufäutig, wie d Musikante hender de Instrumänt…